9 वी व 11 वीच्या विद्यार्थ्यांना वर्गोन्नती : 10 वी चा भुगोल व कार्यशिक्षण पेपर रद्द

9 वी व 11 वीच्या विद्यार्थ्यांना वर्गोन्नती : 10 वी चा भुगोल व कार्यशिक्षण पेपर रद्द
मुंबई - कोरोना विषाणूचा संसर्ग रोखण्यासाठी महाराष्ट्रात 30 एप्रिलपर्यत वाढलेल्या टाळेबंदीच्या अनुषंगाने नववी व अकरावीच्या दुसर्‍या सत्रातील परिक्षा न घेता पहिल्या सत्रामध्ये झालेल्या चाचण्या, प्रात्यक्षिके आणि अंतर्गत मुल्यमापन करून विद्यार्थ्यांची वर्गोन्नती करून त्यांना पुढच्या वर्गात पाठविण्याचा निर्णय घेतला असल्याची माहिती माहिती शालेय शिक्षण मंत्री प्रा. वर्षा गायकवाड यांनी 12 एप्रिल रोजी दिली. यासह इयत्ता दहावीचे भूगोल आणि कार्यशिक्षण हे दोन्ही पेपर रद्द करण्यात आले असून महाराष्ट्र राज्य माध्यमिक व उच्च माध्यमिक शिक्षा महामंडळाच्या प्रचलित व विहित कार्यपद्धतीनुसार विद्यार्थ्यांच्या गुणांबाबत कार्यवाही करण्यात येईल अशी माहितीही मंत्री प्रा. गायकवाड यांनी दिली. यासंदर्भातील प्रस्ताव शालेय शिक्षण विभागाने शासनास सादर केला होता. यावर निर्णय घेऊन त्यासाठी आवश्यक त्या सूचना संबधितांना देण्यात आल्या आहेत, असेही मंत्री प्रा. गायकवाड यांनी सांगितले.